اكرهك ومازلت احبك

الجزء الاول

(الفصل الاول)

بدت القصة يوم فتحت مريم دفتر مذكرتها إلي كانت تكتب فيه من بدا قلبها ينبض بحب ولد عمها حمد. حبته طول عمرها من يوم كان عمرها 14 سنه. بدت قصة حبها لولد عمها حمد وهي تطالعه يسبح في الحوض في بيت عمها بو حمد ويا أخوانها وعيال عمها. الحوض مالهم ماله حديده تمنع حد يطيح في الحوض وبدون ما تحس مريم, دزتها ميرة بنت عمها في الحوض. مريم ما تعرف تسبح وحست ان نهايتها قربت. تمت تزاعق ولولا حمد جان غرقت. عقب ما ساعدها حمد وظهرها من الحوض وجاف انها بخير التفت على ميرة وهو محرج

حمد: ميروووووووووه انتي تخبلتي
ميرة بكل خوف: ما كان قصدي
حمد: شو ما كان قصدج, مريامي كانت بتموت لو ما ساعدتها.

سكتت ميره إلي حست بالذنب. وخافت من نظرات ولد عمها منصور تحمل كل معاني الاتهام. خافت منه وتعرف ان وايد ويا مريم. ابد ما يرفض لها طلب. خافت وهي تعرف انه مريم وايد غاليه عنده. ركضت تدور مكان تنخش فيه. ركضت وهي خايفه بردت فعل اهلها والباقي اذا دروا. وهي تركض يمسكها منصور من يديها وحس بمدى خوفها مع هذا ما اشفق عليها وزعق وقال: انتي ما تخافين ربج. بنت عمي ان صار شي اف مريامي, ما تلومين الا نفسج.

ميره ما قدرت تمسك عمرها, انهارت وتمت اتصيح. كملت دربها ولقتلها مكان واندست فيه. ما كانت تريد ادش البيت عشان ما يحققون وياها سبب صياحها واذا عرفوا بسالفت مريم المحبوبه من بين الكل ومدلعه من اهلها ,بتطيح من عينهم….

مريم قررت ما تخبر اهلها عن إلي صار وقالت حق عيال عمها: اياني وياكم اسمع ان واحد فيكم مخبر على ميره.
منصور وحمد نفس الوقت: بس!!
مريم: لا بس ولا شيء. ميره ما كانت تقصد…

سارت عنهم مريم. سارت تتمشى لين ما تيبس ثيابها المبلله بالماي. مادشت البيت عشان ما يحتشرون عليها يوم ايشوفون ثيابها خرسانه بس كانت تمشي وهي تفكر بولد عمها حمد إلي انقذها يوم طاحت واخوانها ولا سووا شي. اخوانها إلي تموا مبهتين يوم استوا هذا الموقف. كانت تفكر اب حمد ملاك قلبها وفؤادها. انعجبت بشخصية حمد اكثر عن قبل. تحس بأحساس غريب تجاهه. ما قطع حبل افكارها غير اذان العصر ودشت مريم البيت…


دشت البيت وشافت الاولاد ويا ابوها وعمها يتجهزون بيسيرون المسيد. وبعد ما ردوا, كلهم في الصاله غير ميره . ميره المختفيه من الظهر ولا حد شافها. وهم يسولفون ويضحكون شمسة(ام حمد): الا بتخبركم وين ميرووه.
مزنه: اكيد راقده (كانت بالفعل راقدة بس اف مكانها على شبريتها)
ام حمد: فديتج مزوون سيري اتطالعيها. احس بقلبي منقبض.

سارت مزنه تشوف اختها وسارن وياها مهره وروضة. دورن في كل مكان في البيت وما لقنها. يوم سارن الصالة.
مزنه:امايه مادريبها وين.
مهره: دورنا اف كل مكان في البيت مالقيناها.
ام حمد وصوتها تغير : يا حسره عليج يا بنتي.. وين بنتي ابا بنتي. بو حمد دخيلك اتصل في الشرطة خلهم يدورونها…
بو حمد: استهدي بالله يا حرمة, يعني وين بتكون سارت. اكيد في البيت. يالله قوموا بندور عليها.


دوروها ويوم ما لقوها اتطر بو حمد يتصل بالشرطة وبلغهم عن اختفاء بنته. كل هذا ليرضي زوجته الي افكار تييبها وتوديها. وفي نفس الوقت تقوم ميره من الرقاد
ميره: اعوذ بالله من الشيطان الرجيم. انا شو مرقدني في الاستور.
قامت بتسير البيت بس من شافت الباب غيرت رايها واتجهت للحديقة. الكل في البيت مستهم عليها وهي اتحسبهم بيهزبونها على الي سوته.
ميره اف خاطرها: آآآه ولي ويلاه.. اكيد دروا عن سواد ويهي.
وتمت اتفكر عن الي صار وهي يالسه على الميرحانه. صوت خطوات تتقرب منها قطعت حبل افكارها. ما كانت تبا تشوف منصور بعد التهديد الي ياعا منه. صارت ما تتقبل منه أي شي. تمت سرحانه لين ما تكلم منصور.
منصور انتي هنيه والكل يدورج.
ميره: ليش يهمك؟؟
منصور: لو ما يهمني جان ما دورت وياهم. يالله عن الدلع دخلي داخل, كلهم خايفين عليج.
لف ظهره عنها ووقف ولف عليها مره ثانيه:على العموم مريامي قالت لنا محد يخبر عن الي صار اليوم..
ميره من سمعت هالكلمة ارتاحت نفسيتها.
مع هذا كانت تحقد على منصور لانه زعق عليها ولا حتى عطاها أي فرصة تدافع عن عمرها. دخل منصور البيت وسألوه اذا شافها لاكن انكر انه شافها في الحديقة وكلمها. بعدها بدقايق تدخل ميره البيت, تشوف ويه امها متغير وشكلها مستهمه وخايفة. ميره من شتفتها ربعت عند امها تلوي عليها.
ام حمد: ميرووه طيحتي قلبي عليج. وين كنتي؟
ميره: فديتج امايه, ما كان لازم تستهمين عليه جيه, وبعدبن انا كنت راقده, انتو ما دورتوا عليه عدل.
مهره: احلفي انت بس. جلبنا البيت فوق حدر اندورج ما لقيناج.
روضة:هيه ما خلينا مكان ما دورناج فيه.
مزنه:لا يكون كنتي راقده في ...
توها بتكمل وتخزها ميره بنظره اتسكتها عن تفضحها جدام عمها وعياله.
ميره: يالله انا بسير فوق تبون شي.
ام حمد: لا, بس ما عاد اتعيدين الي سويتيه مره ثانيه
ميره: انشالله.
تطلع عنهم ميره, تسير حجتها. تعيد ترتيب افكارها. وبعدها دشت تتسبح وتصلي وتقرأ قرآن...


اما في الصالة بعد ما تطمنوا عليها اهلها, يتصل بو حمد في الشرطة ويستسمح منهم ويبلغهم انه لقا بنته. بعد ما كلم بو حمد الشرطة وردوا كلهم على سوالفهم وبعد ما تفاولو يسترخص بو منصور من اخوه.
بو منصور: زين يا خوي. نستأذن الحين.
بو حمد: تو الناس, ما قعدتوا.
بو منصور: مره ثانيه انشالله, اليوم ورايه شغل. بمرالشركة, اليوم اب طولة ما سرت وما احب شي يصير دون شوري. بتفقد الحلال.
بو حمد: عيل مسموح.الا اقول ترا المره اليايه اف بيتك. (العزيمة)
بو منصور: ولا يهمك محمد, متى ما بغيتوا اتون اقربوا. الحين اسمحلنا.
بو حمد: مسموح, ما عليك اقصور.

وهنيه ينادي بو منصور على حرمته و عياله بيسيرون. مريم تحمل اول ذكرى كتبتها في دفتر مذكراتها وميره تحقد على منصور...


تبتسم مريم للصفحه الي كاتبه فيها هاي الذكرة (موقفا وبداية حبها) وتوها حاطة يديها بتلف على الصفحة الي بعدها ولا تسمع امها تناديها.
ام منصور: مريامي.. مرايم تعالي تحت.
مريم: انشالله امايه. الحين نازلة.

تنزل مريامي عند امها وتتركم اتفكرون اف شو بتقرا وبتتذكر يوم اتلف الصفحة عند الذكرى الثانيه لها مع حب قلبها (حمد)...993366









تحياتي هبله وتستهبل

(الفصل الرابع)

اليوم الي بعده الصبح.
قامت روضة وفي بالها اتسوي شي. قامت اول وحده من البنات (نشاط غير طبيعي). قامت بس عشان تخطط حق طلعه وما تبا اتفوت هالشي دام عمها موجود وطبعا هيه دلوعته وبيطلب من الشباب يودونهم.

روضة وهي قاعده تحن على بنات عمها يقومن: مهروه قومي, مزون انتي بعد.
مهره وهي تتثاوب, ما تبا اتقوم: انزين, بس بنرقد شوي.
مزنه: اففف منج. اسميج اذيه, سيري خلينا نرقد.
روضه: بسكن رقاد. حرام عليكم. انزين ما تبن تظهرن اليوم.
مهره: اقول روضة نحن نعتمد عليج. اكيد ما بتخيبين املنا وبيطلعونا. الحين طلعي برع وبندي الليت...
تمت روضة اتطالعهم لدقيقه وسارت عنهم.

(روضة من النوع الي يحب الطلعات وتعودت على هذا الشيء. وتحب شي اسمه سينما, ما ينزل فلم الا وهيه شايفتنه. ومن هواياتها الانترنت, يعني 24 ساعه وهي مجابلتنه)

سارت روضة صوب الصاله الفوقيه عند الكمبيوتر ولقته مفتوح. قررت تشوف الافلام المعروضة في السينما وبعدها تسير تقنع اخوانها وتاخذ اذن من ابوها عشان يسيرن مرينا مول. يتحوطن وبعدها يسيرن يتطالعن فلم.

طبعا بعد ما جيكت الافلام ومتى بيعرضونهم, وفتحت المسنجر وسولفت ويا اربيعاتها الموجودات ودخلت ال(pool) ولعبتلها كم من قيم, سارت تحت عند ابوها في الميلس. لقت ابوها ويا عمها محمد ومنصور وعلي وخليفه ومايد.
روضة: السلام عليكم.
الكل: وعليكم السلام.
روضة تسلم على ابوها وعمها, وعقب تيلس عدال عمها.
روضة: شحالك ابويه.
سعيد: بخير الحمدالله. انتي شحالج.
روضة: انا يسرك حالي, بابا.
سعيد: بغيتي شيء رويض.
روضة: ابويه عادي نسير اليوم مارينا مول.
سعيد: توج قايمه. يصير خير لين بعدين. مادري. اصلا منو بيوديكن.
روضة: منصور.
منصور: جني اسمع اسمي. فيه شي.
روضة: هيه اليوم بتودينا مرينا مول اوكي.
منصور: يمكن اطلع انا وميود. ولا اقولج مب مشكله بنوديكم وبنتحوط وياكم.
روضة: بابا, شفت بيودينا منصور.
سعيد: روضة حبيبتي, اليوم زحمه. ماشي سيره.
روضة: بابااه, حرام عليك. انزين بنسير من وقت.
سعيد وهو بدى يعصب: روضة!!
نزلت روضة راسها ولا تكلمت, لانها تعرف اذا تفوهت اب اي كلمه بتنهزب.
محمد وهو يمسح يديه على راس روضة: يا سعيد خلها على هواها. بيسيرن كلهن ووياهن منصور وميود. ما بيستوبهن شي.
سعيد: محمد انت ما تعرف زحمت العيد والشباب مازرين المكان.
محمد: خلهن يسيرن. عن خاطرهن. روضة متى تبين اسيرين.
روضة: عقب الغدا زين. يعني وايد من وقت وما بنتأخر.
محمد: خلاص. منصور وميود بيودونكم عقب الغدا.
سعيد: محد مدلع هالبنيه غيرك يا محمد.
محمد: يالله روضه, الحين سيري عند يدتج ويلسي عندها وبعدين بيودونكم.
روضة تبوس راس عمها وتلوي عليه: فديتك عمي. ربي لا خلاني منك.



بعد الغدا وكيف ما قالت روضة البنات مرينا مول ويا مايد ومنصور. تحوطوا شوي ومن حشرت روضة خضعوا لطلبها ودشوا كلهم السينما.
روضة: منصور نحنا بنتجدمكم انزين.
منصور: انزين سيرن.
يوم مشن اشوي تذكر منصور انه ما سألهن شو يبن.
منصور: هيه هيه تريوا. ما تبون ناخذلكم شي.
لفت عليهم روضة, وعقب صدت على البنات وقالت: تبون شي؟
ولا وحده ردت على روضة وردت روضة على اخوها: لا شكرا, بعدين بناخلنا.
منصور: اوكي يالله سيرن, بنلحقكن.

دشن القاعة الي بيعرضون فيها الفلم ويلسن في مجموعة الكراسي الوسطيه في السيد الثالث من فوق. شافوهوم ثنينه من الشباب وكانوا يدريون ان حد وياهم (القصد هم منصور ومايد) فيلسوا في السيد الاخير قريب شوي ومكان محد يحس فيهم وهو نفس الوقت مكان يقدرون يراقبون فيه البنات.

دشوا منصور ومايد ويلسوا في نفس السيد الي خواتهم فيه بس في موجموعة الكراسي الي على اليسار. بدا الفلم والكل اندمج. في نص الفلم روضة ياعت وقالت: انا بسير اشتري اكل. حد يبا شي.
مريم:هيه. ولا اقولج بسير وياج, ميروه بتين.
ميره: اوكي.
خذوا طلب الباقيات واستأذنن من منصور بيسيرن يشترن اكل وطبعا منصور ما رفض الطلب لانه كان اكثر واحد مندمج فيهم وميت من الضحك على الفلم. (الفلم كان action, comedy).

طلعن مريم وميره وروضة ولحقوهم الشابين الي كانوا يباقبورنهم. ما عطن أي اهتمام لأي شخص كان موجود. الي في بالهن كان انهن يشترن الي يبنه ويردن القاعة عشان يكملون الفلم. بس الشابين بدو يحرشون فيهم وعلى طبيعتهن لبسوهم.

منصور ومايد في السينما كانوا يسولفون شوي ويردون للفلم مره ثانيه.
منصور: الا بسألك قوم حمد وين ساروا.
مايد: قالولي بيسيروون يتمشون.
منصور: عيل بتصل بخَلود بشوف وينهم..
في ذاك الوقت كان في ارسال في السينما.
بعد ما رن التلفون
منصور:اوه
خالد: هلا منصور.
منصور: انتو وين.
خالد: في المرينا.
منصور: تعالوا السينما, الفلم عجيب.
خالد: ما يصير الحين نص الفلم راح علينا. يالله بني ناخذ تذاكر وبندش في العرض الي بعده.
منصور اوكي, على هواكم.
بند منصور عن اخوه ورد للفلم.

في الصوب الثاني, مريم وميره وروضة تأذوا من الشابين الي يتحرشون فيهم, ومع هذا تجاهلوهم ولا اعاروهم أي اهتمام. واحد من هل االشباب يأس, لكن الثاني ما كان وده يودرهن الا وهو منتصر.

مريم: يالله, نسير.
واحد منهم: وين تسيرين, صبري شوي.
وهني يجبر مريم تاخذ ورقه كاتب فيها رقمه. ومريم تخوزه عنها ورافضة تاخذ الورقة.
روضة وميره ما عرفن يتصرفن, ولحس حظهن في نفس الوقت خالد وحمد وعلي وخليفه كانوا ياين صوب السينما.
علي: مب جنه هذيلا قوم ميروه اهناك.
خالد: منو هالاثنين الي وياهم.
حمد وخالد ماقدروا يمسكون اعصابهم, وربعوا صوبهم وهد حمد عمره على الشلب الي كان يغصب مريم تاخذ الورقة وضربه (ضربه شوي, الا كسراه من الضرب) لين ما تيمعوا الناس وفجوهم. اما الثاني يوم شاف ربيعه ينضرب شل بعمره وشرد قبل لا يكون مصيره مثل ربيعه.

خالد وهو محرج: وينمنصور؟
روضة: داخل السينما.
خالد:وانتن شو تسون اهنيه؟
روضة يعنا يينا نشتري اكل.
خالد: وهذيلا الاثنين الي كانوا هنيه منو؟
روضة: شعرفني.
خالد وبدا يعصب اكثر: شو يعني شعرفج.
روضة وبكل برود: والله ما قلتلهم اييون يتحرشون فينا. وبعدين نحنا ما عطيناهم ويه بس هم زودوها.
خالد: بس بس بس, فكينا يالله سيري ازقري بنات عمج و اخوج الي ما ينفع اف شي.
علي: استدي بالله يا خالد. حصل خير.
خالد: أي حصل خير. مالت جان على منصور, اونه مودينه ويا البنات بعد. وقبل لا يزاعق هدوه علي وحمد وخليفه.
حمد يوم ين البنات ويا منصورومايد: يالله بنسير البيت.
منصور: ليش شو صاير.
خالد: شو صاير بعد. خسك الله, انت ما منك فيده.
ولف عن اخوه وقال حق البنات: يالله يالله, جدامي.

تبوز روضة على حظها النحس, وخالد معصب ومتضايج من الي صار. منصور مب فاهم شي. ومريم يزيد حبها لولد عمها...

مريم ماسكه دفتر مذكراتهاوتقرا عن الموقف الي يزيد من حبها لحمد. حبها يزيد له وهو يصفع الشاب الي تحرش فيها. يزيد من حبها له يوم ساعدها من ورطه ما كانت بتخلص منها.

فجأه
روضة: انتي هنيهونحنا اندورج. يالله غدا انزلي.
مريم سكرت الدفتر: انزين الحين بنزل.
شلت الدفتر وخشته وتتركم اتفكرون شو بيصير في قصة مريم. هل بتخبر حمد وبتصارحه عن حبها. شو بيصير بين روضة وخليفة, هل بيتمون على نفس الحال. هل منصور متأكد من مشاعره تجاه ميره



تحياتي هبله وتستهبل