اكرهك ومازلت احبك

(الفصل الثاني)

كان دور روضة, هيه و مهره الصياد.
مهره كانت مصعبه الامور لروضة, لانها ما كانت تفر الكوره عدل من كثر ما تضحك على اشكالهم وهم يتراكضون بعيد عن اتزخهم الكره. اما روضة وفي عيونها حقد على خليفة ومتجاهله كل الي يلعبون وياهم لين ما فلعته بالكره على ظهره. كل هذا انتقام لسبب تافه (يوم كانوا عند الحوض, والاولاد يلعبون طائرة يت الكره على راسها بالغلط وكان خليفة هو الي ظاربنها < حليله ما كان يقصد>.
خليفة حس بالضربة القويه الي يته ولف وهو محرج على روضة. طبعا روضة من نظراته حست ان يا الوقت ولازم تنخس عند امها, لكن خليقة ما خلاها اف حالها. ركضت روضة ولصقت في امها, خليفة ما سوى سالفه للي كانوا يالسين وسار عندها ودحاها على ظهرها. كانت اول مره يسويها. اول مره يكون جريء, حتى ان هيه نفسها روضة استغربت منه. ابد ما كان جيه, دوم يستحي بس وجوده اف بيت عمه 24 ساعة ولانه دوم يبات عندهم,خلاه يتأقلم على الوضع ويعتبر روضة مثل أي وحده من خواته, ويعاملها مثل ما يعامل أي وحده فيهن.

اليده: خلوووف.
خليفة: هااه
اليده: ياللي ما تستحي على ويهك ولا تخيل. ليش تضرب رويض.
روضة وتحس بالالم: اااااااااايييي.
خليفة: يدوه, هييه بدت.
اليده: هيه بدت ولا غيره. احشمنا انزي. اخخ عليك, اونك ريال.
خليفة مبوز ولا رد على يدته.
اليده: هيه الحين مدلي البوز شبرين. وخر عني انت مب ريال.
خليفة وهو يتلصق اف يدته: يدوه, عاد خلاص. فديتج, حبيبتي امايه العوده. محد يسواها. بتسامحيني ولا لا.
اليده تمازحه: بفكر, يالله اذلف عن ويهي.
خليفة: الله يسامحج. انزين بتشوفين. والله تراني باسير بالساره عالجبل وبهد اب عمري حشان تفتكين مني.
ولف بيسير عنهم.
اليده: تعال وين ساير... خلووف حبيبي تعال. مالي غيرك يونسني. تعال.
خليفة ما هانت عليه يدته تناديه ولا يرد عليها ولف على طول وسار حضنها وتم حاط راسه على ريولها وهي تمسح على شعره وتعاتبه عشان يحلق شعره الي مطولنه ويوم تمل تتظارب وياه بطريقه مزح.

اذن المغرب وتوضوا وساروا المسيد. اما البنات بعد ما صلن الي يلست على الحشيش مجابل البيت والي سارت صوب الكراجات وين حاطين السكي (ski), (في الصيف يسيروون يسوون سكينج على الرمل قبل لا يسافرون, بس اكثر شيء الاولاد هم الي يسيرون), اما ميره كانت تتمشى بين شير الذره وقررت انها تلقط كم من حبه اف طريجها عند البنات. هذا الوقت كان وقت رجعة الشباب من المسيد, ومنصور اول ما دش المزرعة التفت يدور ميره وشافها يالسه اتلقط ذره بروحها, اغتنم الفرصة وسار يكلم مريم تسيرلها وتخبرها عن كل شي.

طبعا ميره تلقط الذره ومب حاسة اب وجود حد وراها الا يوم شافت ظل حد الي انعككس بسبت الكشاف الي حاطينه عند الزراعة ويوم لفت لقت مريم وراها.
مريم: بووه.
ميره: زيغتيني
مريم: شو تسوين؟
ميره: ألقط ذرة.
مريم: هييه.. انزين ميروه في ناس يبوني اقولج شي
ميره: منو.
مريم: لا تسوين عمرج ما تعرفين. يعني منو بيكون.
ميره: لا صدق منو.
مريم: منصور.
ميره استحت وويها بدى يحمر.
مريم: ياويلي على الي يستحون.
ميره تمت ساكته
مريم: انزين. منصور حاشرني, اسإليها واسإليها وتوه ياي من المسيد وجافج روحج اتيمعين ذره وأذاني الا آيي واكلمج.
ميره وهي مستحيه وستهبل: ليش شي صاير
مريم: احلفي انتي بس انج ماا فهمتي قصدي.
ميره وتستهبل اكثر: لا ماعرف.
مريم: ما تعرفين هاه. انزين دامج ما تعرفين تراه منصورالاهبل متخبل عليج, يبا يتأدك من مشاعرج تجاهه.
ميره وويها صدق احمر واف داخلها مستانسه وردت على مريم اب ابتسامه كشفت لمريم سر بسيط من اسرار ميره.
مريم: يعني موافقة
قامت مريم بسيرعند اخوها الي تم يترياها عند دجت البيت وما عطت ميره أي فرصة تقول شي.

ميره تمت تفكر بالي قالتلها اياه مريم وهي راسمه على ويها ابتسامة قناعة و تفاؤل. اما مريم يالسة ويا منصور وتقص عليه ومنصور مصدق ومتحطم اف داخلة.
منصور: مريوم قولي الصدق, شو قالت.
مريم: اصلا هيه استغربت وقالت انها تعتبرك مثل اخوها وابد ما تفكر انك في يوم تكون خطيبها وريلها.
منصور: قولي والله انها قالت جيه. مريوم بذبحج. انزين سيري اسإليها مره ثانية.
مريم: ليش أسألها. اصلا من شكلها ما تباك.
منصور وحس اب قلبه يحترق: انا بسير أسألها. والله حرام انا اباها وشارنها وهي اقول ما تباني. اذا ما خذيتها ما باخذ غيرها.
وقلم منصور متحطم فؤاده و زعلان وماسك دموعه قبل لا تنزل وتنتهي كل احلامه في بنت عمه الي انعجب فيها وبشخصيتها المرحه وملامحها الطفولية الجميلة. طبعا مريم حست بالذنب وهي تشوف اخوها بهذي الحال فمسكت ايده وطلبت منه انه يقعد بتقوله شي
مريم: منصور, ميروه موافقة. كنت اقص عليك.
منصوروارتسمت اف ويهه ابتسامه كبيره: قولي والله, يعني الي قلتيه قبل شوي كان جذب.
مريم: هييه, كنت ابا اشوف ردت فعلك.
منصور: يا حماره.
مريم اب كل بروود: هههههههه
منصور من كثر ما هو مستانس باس اخته على خدها وركب سيارته وطلع يتحوط لين ما يحطون العشا ووصى مريم تتصله اذا أي حد سأل عنه (أمه ولا أبوه)

بعد العشا.
الشباب والبنات تموا سهرانين برع في نسايم الجو الجميل. يالسين على الحصير و يسولفون ويضحكون ومستانسين اب وقتهم الا ميره الي تمت في الصالة تتطالع التلفزيون. ومحد حس بغياب ميره غير مريم ومنصور طبعا, فسارت مريم عند ميره واقنعتها ان تيلس وياهم عن حد يشك ان ميره فيها شي ولا خاشه عنهم (بالذات عن خواتها التوم وبنت عمها روضة)
مريم: ميروه ليش يالسه بروحج.
ميره: ما شي يالسه اتطالع تلفزيون.
مريم:يالله قومي تعالي يلسي عدنا برع.
ميره: مابا, بتطالع البرنامج.
مريم: ادري انج مب متبعه ويا البرنامج. يا غبيه كلهم بيشكون. على العشى وما يلستي ويانا ويوم انسولف طول الوقت وانتي ساكته. جيه بيشكون فيج وتعرفين انتي خواتج المصونات هن وروضوه فظوليات وما بتقدرين تتخلصين منهن.
ميره تمت تفكر وهي ساكته.
مريم: يالله قومي. دامهم مب حاسين فيج.
ميره: اوكي
وسارن ييلسن وياهم, وكملوا سوالفهم جان اتقول مهره حق ميره اتغنيلهم وهي ناسيه ان روضة قايلتلها ما تخبر حد عن الموهبه الي عندها وهي الوحيده الي تدري.
مهره: روضة, غني غنية اصيل, (من عيوني)
روضة اتقفطت ولفت على مهره وخزتها اب عينها عشان تسكت, بس للاسف بعد شو, بعد ما عرف خليفة وتم مصر على روضة تغني.
خليقة: روضوه يالله غني.
روضة:هاه.. شوه.. ماعرف اغني منو قالك اني اعرف اغني.
خليفة: ترا ما بخليج تلعبين بالدراجة.
روضة اهم شيء كان بالنسبه لها في هالرحلة انها تركب الدراجة دام عندهم حوش عود ورمل ومكان وسيع يسانسون فيه بالدرجات, فاستسلمت للامر الواقع وغنت.

روضة: احم احم
توها بتبدا جان يقاطعها خليفة: صبري.
وسار ياب العود ماله من السياره وياب الدرنكه مالت علي.
خليفة: يالله الحين غني وانا بدق على العود وعلوه عالدرنكه.
استحت روضة يوم شافتهم كلهم متحمسين لكن تشجعت عشان يخليها خليفة تلعب اب دراجته.
روضة تغني وخليفة وعلي يدقون: من عيوني لوتطلب عيوني... حبيبي حبك اف قلبي شجوني.. عيون الناس تسأل ليه احبك.. وانا ما همني لو يسألوني...

الكل انعجب اب صوت روضة حتى مريم الي ما كانت تدري ان اختها صوتها حلو يوم تغني. مع هذا كان العود والدرنكه مكملين على الغنيه وخلى لحن جميل يجمع من بينهم وكلمات الغنيه. اما ميره فكانت في عالم ثاني. عالم الخيال , تسبح فيه مع افكارها الي تاخذها لمنصور. ومنصور فكانت كلمات الغنيه ترن في اذنه وهو يتطالع ميره وشارد الذهن.

(لا تنسون ان القصة في دفتر مذكرات مريم)

خليفة: روضوه, صوتج وايد حلو مشالله.
روضة على غير عادة البنات يستحن, ردت اب كل دفاشة: اول مره اسمع منك كلمة حلوه.
خليفة وماله بارض يتضارب وياها: اقول, غني غنيه ثانيه وانا بدق بالعود.
روضة: انزين شو اغني. ماشي اف بالي الحين.
مزنه: غني شي يربش.
روضة وتأقلمت على الوضع وتكلم عمرها: ممممممم غينيه تربش. غنيه تربش.
قطعت عليها تفكيرها مزنه وقالت: غني كما الريشه.
روضة: اوكي, يالله خلوف دق وانا بغني.

غنت روضة وخليفة من خاطره يدق على العود. تم الكل مرتبش ومستانس ويصفقون وكلما تخلص غنيه تكمل روضة اب مقطع من غنيه ثانيه. بعد هالسهره كلهم ساروا يرقدون ومنصور يخطط انه يخبر ابوه انه بيخطب بنت عمه ميره.

مع تحياتي هبله وتستهبل